ხანდახან, ყოველდღიური რუტინისგან თავის დასაღწევად და გადასატვირთად სულაც არ არის საჭირო ორკვირიანი შვებულება და შორეული კონტინენტები. ხშირად, კარგად დაგეგმილი 4-5-დღიანი მოგზაურობა, ბევრად უფრო მეტ ენერგიასა და შთაბეჭდილებას გვმატებს, ვიდრე ხანგრძლივი, მაგრამ ერთფეროვანი დასვენება.
ბევრი ფიქრობს, რომ ევროპაში გამგზავრება დიდ ფინანსებთანაა დაკავშირებული, მაგრამ სინამდვილეში, მოგზაურობა არ არის ძვირი, თუ სწორად შეარჩევთ მიმართულებას და ჭკვიანურად დაგეგმავთ ბიუჯეტს.
თუ მხოლოდ რამდენიმე თავისუფალი დღე გაქვთ და გსურთ, ეს დრო მაქსიმალურად შთამბეჭდილებებით აავსოთ, გთავაზობთ 4 ევროპულ ქალაქს, რომლებიც იდეალურია ბიუჯეტური და ხანმოკლე ვიზიტისთვის.
ბუდაპეშტი, უნგრეთი
“დუნაის მარგალიტი” იდეალურია 4-5 დღიანი მოგზაურობისთვის. ქალაქი პირობითად ორ ნაწილად იყოფა: ბორცვიანი, ისტორიული “ბუდა” და ბრტყელი, ციცხალი “პეშტი”.
4-5 დღეში თქვენ თავისუფლად მოასწრებთ პარლამენტის გრანდიოზული შენობის ნახვას, მეთევზეთა ბასტიონიდან საოცარი ხედებით დატკბობას, ებრაულ კვარტალში ცნობილ “Ruin Bar”-ებში (ნანგრევებში გახსნილ ბარებში) დროის გატარებას და, რა თქმა უნდა, მსოფლიოში ცნობილ სეჩენის თერმულ აბანოებში განტვირთვას.
ბუდაპეშტი კვლავ რჩება ერთ-ერთ ყველაზე ხელმისაწვდომ ევროპულ დედაქალაქად, სადაც საკვები, ტრანსპორტი და განთავსება საგრძნობლად იაფია.
კრაკოვი, პოლონეთი
პოლონეთის კულტურული დედაქალაქი ნამდვილი ზღაპარია. ქალაქი თითქმის უვნებლად გადაურჩა მეორე მსოფლიო ომს, ამიტომ მისი ძველი ცენტრი სრულად ავთენტურია.
ქალაქის გული ევროპის უდიდესი შუა საუკუნეების მოედანია (Rynek Główny). 4-5 დღე სრულიად საკმარისია ვაველის სამეფო ციხესიმაგრის, უძველესი ებრაული კვარტლის (Kazimierz) დასათვალიერებლად. თუ დრო დაგრჩათ, შეგიძლიათ ნახევარი დღე დაუთმოთ ახლომდებარე ველიჩკის მარილის შახტებს.
კრაკოვი ერთ-ერთი ყველაზე ბიუჯეტური მიმართულებაა ამ სიაში. აქ უგემრიელესი ადგილობრივი საკვების (მაგალითად, “პიეროგის”) დაგემოვნება და კომფორტულად ცხოვრება მინიმალურ ფასად შეგიძლიათ.
პრაღა, ჩეხეთი
პრაღა არის ქალაქი-მუზეუმი ღია ცის ქვეშ. მისი გოთიკური არქიტექტურა, ასტრონომიული საათი და ვლტავის სანაპიროები ნებისმიერ სეზონზე მომაჯადოებელია.
4-5 დღე იდეალურია იმისთვის, რომ დაუჩქარებლად გაიაროთ ლეგენდარული ჩარლზის ხიდი, ახვიდეთ პრაღის ციხესიმაგრეში, დაიკარგოთ ძველი ქალაქის ვიწრო ქუჩებში და საღამოს ტრადიციულ ჩეხურ პაბში დააგემოვნოთ ადგილობრივი ლუდი.
მიუხედავად პოპულარობისა, პრაღა მაინც ინარჩუნებს ხელმისაწვდომ ფასებს, განსაკუთრებით ცენტრიდან ოდნავ მოშორებით მდებარე კვების ობიექტებსა და ბარებში.
ლისაბონი, პორტუგალია
თუ დასავლეთ ევროპისკენ მიგიწევთ გული, მაგრამ ბიუჯეტი გიზღუდავთ, ლისაბონი საუკეთესო არჩევანია. ეს არის კონტრასტების, ფერადი კრამიტის (Azulejos) და სევდიანი ფადუს მუსიკის ქალაქი.
4-5 დღეში მოასწრებთ ისტორიული ყვითელი ტრამვაით (Nº28) მგზავრობას, ალფამას უბნის ლაბირინთებში სეირნობას, ბელემის კოშკის ნახვას და მსოფლიოში ცნობილი “Pastel de Nata”-ს დაგემოვნებას. თუ ერთი დღე დაგრჩათ, შეგიძლიათ ოკეანის სანაპიროზე, ქალაქ კაშკაიშში გაემგზავროთ.
ლისაბონი დასავლეთ ევროპის ერთ-ერთი ყველაზე იაფი დედაქალაქია. აქ ზღვის პროდუქტები, ღვინო და ტრანსპორტი გაცილებით იაფია, ვიდრე მეზობელ ესპანეთში ან იტალიაში.
მაქსიმალური შთაბეჭდილებების მისაღებად ხანგრძლივი და ძვირადღირებული მოგზაურობა სულაც არ არის აუცილებელი. ეს ოთხი ქალაქი ამტკიცებს, რომ სულ რაღაც 4-5 დღეში შესაძლებელია სრულიად ახალ კულტურაში ჩაძირვა, დასვენება და დაუვიწყარი მოგონებებით დაბრუნება. მთავარია სწორი დაგეგმვა და თავგადასავლების სურვილი!
